BAXIŞ MÜSABİQƏSİNİN QALİBİ

Bakıda aprelin 12-14-də Uşaq və Yeniyetmələrin IV Respublika Elmi-Texniki Yaradıcılıq müsabiqəsinin final mərhələsi keçirilib. Müsabiqədə zona baxışlarının qalibləri öz modellərini nümayiş etdiriblər. İştirakçılar arasında Gəncə şəhər Gənclərin Texniki Yaradıcılıq Mərkəzinin yetirmələri də olub. Hərbi-texniki modellər nominasiyasında Mərkəzin yetirməsi, 6 saylı məktəbin 8-ci sinif şagirdi Nicat Qafarov müsabiqənin 1-ci dərəcəli diplomu və qiymətli hədiyyə ilə təltif olunub. Qeyd edək ki, Nicat ardıcıl olaraq üç il bu yarışların qalibi olub. Gəncə Texniki Yaradıcılıq Mərkəzinin direktoru Vaqif Qafarov baxışda fəal iştirak etdiyinə görə, Respublika Gənclər, İdman və Turizm Nazirliyinin diplomuna layiq görülüb.

GƏNCƏDƏ KLİP ÇƏKİLİR

Gəncədə Kərbala faciəsi mövzusunda ilk dəfə olaraq video klip çəkilir. Klipdə səslənən musiqinin ifaçısı və sözlərin müəllifi Əhməd Həsənovdur. Musiqi üzərində oranjmanı Xaqani Ramizoğlu edib. Klipin rejissoru, bir neçə sənədli filmin müəllifi İsmayıl Abbasdır. O, klipin çəkilişi haqda bunları söylədi: "Bəzi maliyyə problemlərinin olmasına baxmayaraq çəkilişlər nəzərdə tutulan qrafik üzrə gedir. Təəssüf ki, Gəncədə dini mövzuda video materialların az olması bizə xeyli çətinliklər yaratdı". Klipin təqdimatı aprel ayının ortalarında nəzərdə tutulub.

IDMAN:VOLEYBOL,BOKS,DZÜDO,BASKETBOL,KARATE,ƏLBƏYAXA DÖYÜŞ

Voleybol 
Xəbər verdiyimiz kimi Gəncə şəhərinin ali və orta ixtisas məktəblərinin spartakiadası start götürmüşdür. Yarışda şəhərin yüzlərlə tələbə idmançısı öz güclərini sınayırlar. Birinci meydançaya voleybolçu oğlan və qızlar çıxıblar. Bu yarışmada ali məktəblərin arasında Gəncə Dövlət Universitetinin hər iki komandası fərqlənib. Orta ixtisas məktəbləri arasında Humanitar kollecin oğlan və Tibb texnikumunun qızlar komandaları qalib gəliblər. Həndbol komandalarının arasında da Gəncə Dövlət Universitetinin idmançıları daha yaxşı çıxış ediblər. Tibb texnikumunun komandası oğlanlar arasında (öz qruplarında) birinci olub. Futbol yarışı Texniki kollecin idman zalında keçdi. Turnirdə ali məktəblərin komandaları arasında AzTU-nun futbolçuları birinci, orta ixtisas məktəbləri arasında isə, meydan sahibləri - Texniki kollecin futbolçuları çempion oldular. Spatrakiadanın basketbol turnirinə aprelin 13-də start verilib.

Boks
Aprelin 7-11-də Bakı Olimpiya İdman Kompleksində boks üzrə 1985-87-ci il təvəllüdlü gənclər arasında ölkə birinciliyi keçirilib. Rinqə Bakı, Gəncə, Sumqayıt, Əli Bayramlı, Mingəçevir, Astara, Cəlilabad, Quba və Lənkərandan 142 gənc əlcək ustaları öz güclərini sınayıblar. Gəncə idmançıları bu birincilikdən evə dörd bürünc medalla qayıdıblar. Mükafatları spartakçı Tural Abbasov (48 kq), "Təhsil" İdman Mərkəzinin təmsilçiləri Röyal Əliyev (54 kq), Hüseyn Məmmədov (60 kq) və Sübhan Abbasov (64 kq) qazanıblar.

Dzü-do 
Gəncə şəhər "Dinamo" İdman cəmiyyətinin salonunda aprelin 11-də 1989-90-cı illərdə anadan olmuş yeniyetmələr arasında cüdo üzrə şəhər birinciliyi keçirilib. Tatami üzərinə 40-a yaxın idmançı çıxıb. Onlar "Dinamo", "Spartak", "Təhsil" İdman Mərkəzinin, 1 və 2 saylı UGİM-in yetirmələri olub. Bir günlük mübarizədən sonra öz çəki dərəcəsində şəhər çempionu adına Aqşin Rzayev ("Təhsil"), Röyal Əliyev (2 SAYLI UGİM), Ceyhun Ələkbərov (1 saylı UGİM), spartakçılar Vüsal Həsənov, Vüqar Tağıyev, Orxan Mustafayev və dinamoçu Vasif Qasımov layiq görülmüşlər. Qaliblər may ayında keçiriləcək gənclərin IV Respublika oyunlarında iştirak edəcəklər.

Basketbol
Bakı Olimpiya İdman kompleksində aprelin 6-dan 10-a kimi kişi basketbolçular arasında ölkə kuboku uğrunda yarışlar keçirilib. Fəxri kubok uğrunda respublikanın 8 komandası, o cümlədən Gəncə basketbolçuları, mübarizə aparıb. Birinci mərhələdə komandalar iki qrupda yarışıblar. Gəncə basketbolçuları öz qrupunda "Gənclik AzTU" komandasına 50:68, "Bakı Sığorta Şirkətinə" (BSŞ) - 34:111 uduzublar və yalnız Şəki idmançılarına 60:53 hesabı ilə qalib gələrək qrupda uçuncü yerə çıxıblar. Komanda ilk dördlükdə yer almayıb və nəticədə 6-cı yerə çıxıb.

Karate
Aprelin 12-13-də Bakıda karate WKF üzrə gənclər və böyüklər arasında ölkə çempionatı keçirilib. Yarışda medallar uğrunda 30 komandanı təmsil edən 250 idmançı döyüşüb. Karateçilər kata və kumite üzrə yarışıb. Bu çempionatda Gəncə idmançıları uğurla çıxış edib və qaliblər arasında öz yerlərini tutublar. Kata üzrə qızlar arasında Könül Rzayeva (Olimpiya kompleksi), kişilər arasında isə Yasin İsmayılov (Təhsil) qızıl medala layiq görülüblər. Kumite üzrə kişilər arasında dinamoçu Fuad Allahverdiyev (80 kq) bütün görüşlərdə qalib gələrək Azərbaycan çempionu olmuşdur. Kadetlər arasında bu növdə 60 kq-da Vüqar Rübaxşi (Olimpiya kompleksi) gümüş, dinamoçu Azər Məmmədov (55 kq) bürünc medalların sahibi olublar.

Əlbəyaxa döyüş
Bu günlərdə Rusiyanın Kislovodsk şəhərində əlbəyaxa döyüş idman növü üzrə gənclər arasında MDB ölkələrinin birinciliyi keçirildi. Yarışda Gəncə şəhərini "Dinamo" İdman Cəmiyyətinin üzvü Murad Əliyev (məşqçi Əziz Əzizov) təmsil edirdi. Həmyerlimiz yarışda dörd döyüş keçirib, onlardan üçündə qalib gələrək 40 kq çəki dərəcəsində gümüş medala layiq görülüb. Bu, Muradın birinci uğurlu çıxışı deyil. O, Gürcüstanda keçirilən Beynəlxalq turnirin qalibi, ciu-citsu üzrə iki dəfə ölkə çempionu olmuşdur.